Vawiin ni 10, September 2026 (Ningani) khan Supreme Court chuan social media leh digital platform dang hman kawnga naupangte tana khuahkhirhna siam tura ngenna chu a ngaihtuah a. Court chuan sorkar laipui hnenah hriattirna a pein, he ngenna chungchanga an insawifiahna thehlut turin a ti bawk. Chief Justice Surya Kant, Justice Joymalya Bagchi, leh Justice V. Mohana te Bench chuan he thubuai hi an ngaihtuah a, khuahkhirhna siam chu a tul an tih thu an tarlang ve nghal a. Justice Bagchi chuan social media hman kawnga naupangte tana venhimna tha a awm theihna turin firewall a ngaih thu a sawi a bawk.

He thubuai hi Just Rights for Children Alliance te thehluh a ni a. An ni hian naupang kum 18 la tling lo te chu an nu leh pa te emaw an legal guardian emaw remtihpuina tello chuan social media khawih tir phal lo turin an ti a. An kum chungchanga endikna mumal a awm loh chuan hursualna, digital trafficking leh social media a thil tha lo tak tak te avanga an tuar a hlauhawm thu an sawi a . Tin, kum tlinglote'n social media an hman dawn chuan an nu leh pate phalna la hmasa chauh a an hman theih nan sorkar chu e-KYC emaw thil dang duang turin a ti a. Information Technology Rules, 2021 chu siamthat emaw kaihhruaina thar siam emaw an phut a. He ngenna hi naupangte tana social media hman khap burna ni lovin, an tana venhimna tha zawk a awm theih nana tih a nih thu an tarlang tel bawk(www.jclalnunsanga.in)

(He thubuai hi Just Rights for Children Alliance vs Union of India & Anr WP(C) No.1120/2026 a ni a. Thubuai thehluttu tan hian AOR Saksham Maheshwari leh Sr. Adv HS Phoolka an ding)