Ni 13, February 2026 khan Supreme Court chuan Central Bureau of Investigation (CBI) te chu Manipur-a hnam intihbuaina kaihhnawiha, hmeichhe chunga hursualna thubuai 11 chhuichianna report pe turin a ti. Supreme Court chuan he thubuai hi Justice Gita Mittal Committee in buaipui tawh lovin, Manipur High Court buaipui chhunzawm turin a ti a. CJI Surya Kant leh Justice Joymalya Bagchi te bench chuan  Manipur High Court Chief Justice tharin a dinhmun a chelh tawh avangin thubuai chinfel anih vat theih nan, Manipur High Court kutah a dah ta a ni.

A tuartute tana ding, Advocate Vrinda Grover chuan CBI lamin an chhuichianna dinhmun chu a tuartute hnenah an hrilhhriat that loh thu a sawi a. A tuartu zinga pakhat phei chu January 2026 khan a boral a, chargesheet thehluh a ni tih pawh a hre ta lo a ni. Trial thenkhatah chuan pawikhawihtua puhte leh CBI lam chu an inlan that loh thu a sawi bawk. Grover chuan a tuartu tam tak te chu an himna hlauhthawnawma a awm avangin Manipur-a kal leh pawh an hlau tawh a, a tuartu 11 te chu thubuai chhuichianna chanchin chu engmah hrilhhriat a nih ngai loh thu a sawi bawk.

Supreme Court chuan dan lalberna a lo awm zel theih nan leh thuhretu leh a tuartute tana boruak muanawm a awm theih nan Manipur High Court leh Gauhati High Court Chief Justice te chu thawk dun turin a ti a.Tin, CBI te chu he thubuai ngaihtuah leh a nih hun, ni 26, February 2026 a report thehlut turin a ti bawk(www.jclalnunsanga.in)

(He thubuai Dinganglung Gangmei vs. Mutum Churamani Meetei &Ors. ah hian thubuai thehluttu tan Adv. Vrinda Grover, AOR Akriti Chaubey leh Ukil dangte an ding a,  a leh lam tan Attorney General R Venkataramani, Soliciter General Tushar Mehta leh ukil dangte an ding)