Supreme Court chuan Central Sorkar chu kawngpuia accident tawk te leh an chhungte’n rang tak a zangnadawmna (interim compensation) an hmuh theih nana scheme duan thar Compensation to Victims (Interim Relief) Scheme, 2026 chu mipui te’n an hriat ngei theih nana nasa tak a thehdarh turin a hriattir a. Justice JB Pardiwala leh Justice KV Viswanathan-te bench chuan hemi chungchang hi  October 16, 2026 khan ngaihtuahin, he hriattirna hi an chhuah a ni. Bench chuan he scheme hi duan a nih ringawt a, a hmangtu tur mipui te’n an hriat leh si loh chuan awmzia a nei dawn lo a ni, tiin an sawi.

Kawngpuia accident tawkte leh an chhungte hian zangnadawmna hi an hmu har thei em em a. A kalphung chuan hun a duh rei thin em avangin, an dil hunchhung atana zangdawmna lo dawn lailawkna atan he scheme hi duan a ni a. Nimahsela, he scheme thar hian insurance nei lirthei chesual chauh a huam nia a lan avangin Court chuan lirthei insurance neilo chesual te pawh hi scheme hian a huam tel ve  em tih tichiang turin sorkar laipui chu a zawt nghal a ni.

He scheme hi Motor Vehicles Act, 1988 a Section 164A hnuaia duan a ni a. Accident tawk te emaw, a thi ta te aiawh diltu te chuan e-portal hmangin rang takin zangnadawmna hi an dil thei dawn a ni. Accident thlen ațanga ni 90 chhungin investigating officer chuan Detailed Accident Report chu portal-ah hian an upload ngei tur a ni a. Insurance company pawhin dilna chu ni 30 chhungin a chhan chiang tak nen an pawmin emaw an hnawl tur a ni. Court chuan Sorkar laipui chu he scheme hi Official Gazette-a chhuah tur leh taka mipuiin an hriat theih nana thehdarh ngei turin a ti a ni. He thubuai hi November 25, 2026 ah ngaihtuah chhunzawm leh a ni ang(www.jclalnunsanga.in)