Supreme Court chuan kum 1999-a Australian missionary, Graham Staines leh a fapate pahnih thahna thubuaia dam chhung lungin tang tura hrem, Dara Singh-a chhuah zalen (remission) dilna chungchanga thutlukna an siam vat lo a nih chuan Odisha sorkar thuneitute chu Court-a koh an nih tur thu an sawi. Vawiin 8th September hi he thubuai ngaihtuah leh hun a ni a. Nimahsela, Odisha sorkar tana ding ukil chu damlohna avanga a inlan theih loh avangin thubuai ngaihtuah hun chu sawn an dil a. Justice Manoj Misra leh Justice Vijay Bisnoi te chuan he thubuai hi ngaihthlain, sorkar thuneitute chuan he thutlukna siam hi an tikhawtlai reng tur a nih loh thu an sawi a ni.

Ni 19, August 2026 a he thubuai ngaihtuah a nih khan Orissa Sentence Review Board hnenah thutlukna hi thubuai ngaihtuah leh hmaa siam turin a ti a, hemi chhung a an siam lo anih chuan Supreme Court hian anmahniin thutlukna an siam tawh tur thu a lo hriattir tawh a ni. Hemi hma hian Court chuan Odisha sawrkar chu August 19-a thutlukna siam hman turin a lo hrilh tawh bawk a ni.

January 22, 1999 khan Odisha-a Manoharpur khuaah, Dara Singh-a leh mipui rual a hruaite hian Australian Missionary, Graham Staines leh a fapa Philip (kum 10) leh Timothy (kum 6)-te chu motor-a an mutthilh laiin, an awmna motor chu an hal a.Dara Singh hi kum 2003 khan trial court-in thi tura hremna a pe a. Nimahsela, High Court-ah he thutlukna hi khingletin, kum 2005-ah Orissa High Court-in dam chhunga lung in tang turin a hremna an tih hniam sak a. High Court thutlukna hi kum 2011-ah Supreme Court-in a lo nemnghet leh a ni.

Dara Singh hian kum 26 chuang lung inah a tang tawh a, lung ina a tan chhung hian parole-a vawikhat mah chhuah a nih loh thu a sawi a. Tin, a thil tih chu a tleirawl lai a, India venhim a duh luat vang a nih thu a sawi a. Lung inah hian kum tam tak a tan tawh avang leh a thil tihah a inchhir avangin chhuah zalen a dil thu a sawi sni. He thubuai hi 17th September-a ngaihtuah leh tur a dah a ni(www.jclalnunsanga.in)

(He thubuai hi Rabindra Kumar Pal @ Dara Singh vs State of Odisha Diary No. 11407-2024 a ni. Dara Singh aiawh hian Adv Hari Shankar Jain leh Adv. Vishnu Shankar Jain te an ding)