Ni 31, July 2026 khan Supreme Court, Chief Justice Surya Kant, Justice Joymalya Bagchi leh Justice V Mohana te Bench chuan court kal lai video leh audio thehdarh khapna chungchanga an interim order chhuah tawh chu an sawifiah a, he khapna hian news thehdarhtute’n court kal lai a thilthleng an thehdarh hrim hrim chu a khap a ni lova, amaherawhchu, court kal lai audio leh video te chu phalna la hmasa lova thehdarh phal a nih loh thu an sawi chiang a.

Court chuan chanchin thar thehdarhtute chuan court-a thubuai kal dan te, dan lama thil tih danglam awm te leh court thutlukna te chu an thehdarh theih reng thu leh khap anih loh thu an sawi a. Nimahsela, court kal lai audio leh video erawh te chu phalna la hmasa lova thehdarh khap tlat a nih thu an sawi. Supreme court in interim order a chhuah hmasakah khan, social media leh digital platform-a court kal lai recording tawi te te a lak chhuah, siam danglam, upload leh thehdarh chu thuneitu court, Registrar General phalna la hmasa lo chuan a khap tlat a. Bench chuan order chhuah hmasak a paragraph 11-na chuan hriatthiamlohna a siam avangin sawifiahna a pe leh a ni.

He thubuai hi journalist pakhat Harshita Grover-in, court kal lai recording tawi te te a lak chhuah leh siam danglam hnu thehdarh a nih thin chungchanga kaihhruaina siam tura a ngenna a ni a. He thubuaiah hian court kal laia thilthleng tawi te te chauh lakchhhuah a thehdarh a nih hian court zahawmna leh vantlang mipuiin court an rinna a tlakhniam phah theih thu leh, rorelna dik kengkawhtu atana an rinna an a chhiat phah theih thu sawi a ni. He thubuai hi ni 18, September 2026-ah ngaihtuah leh a ni ang(www.jclalnunsanga.in)

(He thubuai hi Harshita Grover v. Union of India & Others, W.P.(C) No. 751/2026 a ni. Thubuai thehluttu tan hian Vikas Singh, Sr. Adv, Anil Kumar, AOR leh ukil dangte an ding a. A leh lam tan hian Radhika Gautam, AOR, Kunal Chatterji, AOR, Manisha Ambwani, AOR, Sajan Poovayya, Sr. Adv leh ukil dangte an ding)