Ni 3, August 2026 (Thawhtanni) khan Supreme Court chuan Arunachal Pradesh Chief Secretary leh Home Secretary-te chu, CBI te’n Arunachal CM Pema Khandu eiruk thubuai an chhuinaa, an thawhpui tha duh lo anga an hmuh avangin, thubuai ngaihtuah leh hun, August ni 24-a Court-a inlan turin a koh a, insawifiahna pe turin a ti bawk. He thubuai hi Division Bench, Justice Vikram Nath leh Sandeep Mehta te chuan ngaihtuahin contract hna pek chungchanga induhsakna awm ni a sawi , CBI te chhuichianna report an thehluh chu an ngaihtuah a. Court chuan report-te ngun taka a ngaihtuah hnuah, state sorkar atanga record hrang hrang nei tura CBI te chuan harsatna an tawk tih a hmu a. Sorkar atanga thawhpuina tha CBI chuan an dawng lo niin court chuan a hmu a, Chief Secretary leh Principal Secretary(Home) te chu thubuai ngaihtuah leh hunah koh ngei a tulin an hria a ni.

He thubuai hi NGO pakhat, Save Mon Region Federation-te PIL thehluh atanga intan a ni a. He PIL hi CBI emaw Special Investigation Team(SIT) te chu Arunachal Pradesh-a public works contract hnathawh tur, CM Khandu chhungte leh laina hnai firm hnena pek a nih chungchang chhuichiang tura ngenna a ni a. Hmasawnna hna Rs.1,245 crore vel hu leh Rs.25 crore hu hna dangte chu Chief Minister chhungte leh a laina hnai firm-te hnenah pek a ni a. Hemi chungchangah hian induhsakna leh dan bawhchhiatna a awm nia sawi a ni. Petition-ah hian Khandu-a nupui firm M/s Brand Eagles chuan sorkar contract hna engemaw zat a hmuh thu tarlan ani a, a chhungte dang, a vahpa thlengin public works contract hna hi pek a awm thu tarlan a ni.

Ni 6, April 2026 khan Supreme Court judge pathum, Justice Vikram Nath, Sandeep Mehta leh NV Anjaria-te bench chuan CBI chu kar hnih chhung a chhuichianna nei turin a lo ti tawh a. Tin, January ni 1, 2025 atanga December ni 31, 2025 inkara public works contract leh work order pek te chu chhuichiang turin an ti a. Hemi tum hian Court chuan Arunachal Pradesh sorkar chu CBI chu pui turin leh, nodal officer ruat a, document hrang hrang te chu tih chhiat a nih loh nana hma la turin a ti tawh bawk(www.jclalnunsanga.in)