Punjab leh Haryana High Court chuan sorkar-in social media platform-a page emaw online content te  chu block emaw paih tur a thu a pek chuan, platform te hnena an thil tih chhan an hrilh thin chu a tuartu hnenah pawh hrilh ve ngei tur a ni, tiin thutlukna an siam. Court chuan he thil hian social media hmangtute tana an thutlukna khinlet theihna hun a pek mai piah lamah, dik tak a thil tih a nih theih nan a puih dawn thu an sawi.

He thutlukna hi August 21-a Haryana Police te thupek anga Meta-in Haryana 24 News Network Private Limited te page an block sak chungchang a ni. Haryana 24 News Network Private Limited te chuan High Court-a an page block sak a nih chungchang chu an khinglet a. Justice Tribhuvan Dahiya chuan social media hmangtute chu sorkar-in an thil post te block sak an nih chhan leh an innghahna te chu chiang tak a hriattir tur an ni a ti a. Court chuan  Information Technology Rules, 2021 chuan hriattirna pek chungchang hi sawi lo mahse, rorelna dik a thlen theih nan a thil tih ngai a ni, a ti.

High Court chuan he page block tur a thu petu chu Senior Superintendent of Police (SSP), Yamunanagar a nih thu a hmu a. Court chuan SSP chuan dan ding laiah hian he thupek pe tur hian thuneihna  a neih loh thu a sawi a, he thupek pe tur chuan Inspector General of Police rank tal a ngaih thu a tarlang bawk a ni. Court chuan SSP chu Haryana 24 News Network te social media page chu he order copy an dawn hnu atanga darkar 24 chhung a siam tha leh turin a ti bawk(www.jclalnunsanga.in)