Madras High Court chuan thubuai chhuichianna neih lai a police-te zawm tur kaihhruaina a chhuah a.  Court chuan police-te chu thubuai thehluh a hming tarlan emaw, thuhretu tura koh apiangte chu Bharatiya Nagarik Suraksha Sanhita (BNSS), 2023 Section 179 hnuaiah police hmaa inlan tura koh na chu ziakin lehkhaah an pe thin tur a ni tiin thupek a chhuah a. Hemi bakah hian, thubuai chhuichian chhunga thil thleng te chu police station General Diary-ah ziah luh vek tur a ni bawk. Heng kaihhruainate hi Justice G.K. Ilanthiraiyan chuan a chhuah a ni.

High Court-a he thubuai thehluttu chuan thubuai chhuichianna hming vuaha police-te'n mipui te chunga harsatna an siam thin chu titawp tura ngenna a thlen a. Police-te chuan High Court-a thubuai thehluttu chungah hian thubuai thehluh a awm avangin thubuai chhuichianna chu kalpui mek a ni tih Court an hrilh a. Thubuai thehluttu erawh chuan police-te'n thubuai chhhuichianna neih chhungin a chungah harsatna an thlen nasat thu a sawi ve thung.

Court chuan police-te'n thubuai chhui chianna nei thei tura thuneihna an nei tih a hria a, nimahsela chu thuneihna chu danin a sawi angin an hmang tur a ni tiin a sawi a. Police-te chet dan mawi lo avangin mi tam tak Court-ah tanpuina dilin an rawn kal thin tih a hmu bawk. Chuvang chuan, Court chuan police officer-te chu ziaka lehkhaa police hmaa inlan tur a kohnaah, a ni leh a hun chiang taka ziak tura tiin, General Diary (Station Diary)-ah enquiry minute-te ziak lut thin tur leh enquiry tura koh te tihduhdah leh buaina siamsak lo turin thupek a chhuah a ni. A bikin preliminary enquiry leh FIR registration chungchanga Supreme Court-in Lalita Kumari v. Government of Uttar Pradesh (2014) thubuaia kaihhruaina a lo siam tawhte chu zawm ngei turin police-te hi a hriattir bawk(www.jclalnunsanga.in)

(He thubuai hi Varadhan v. State (Case No.: CRL OP No. 15130 of 2026) a ni. Thubuai thehluttu tan Adv. G.Mageshkumar a ding a, sorkar tan A.Amarnath, Additional Public Prosecutor a ding)