Ni 18, August 2026 khan Supreme Court chuan thi tura hremna atana inkhaihlum hman thin chu India Danpui kalh a ni tia puang tura ngenna chu a hnawlsak. Senior Advocate Rishi Malhotra-a’n dilna a thehluhah hian inkhaihlum aia na lo zawk, chiu hlumna hmanga thlak a dil a. Justice Vikram Nath leh Justice Sandeep Mehta te Bench chuan  Judge pathum(3) thutna Bench-in 'Dina' case-a a lo ngaihtuah tawh, inkhaihlumna hmanga hremna chu India Danpui kalh a ni lo tia thutlukna an lo siam tawh chu ngaihtuah nawn leh nachhan tur chhan tha tawk tak awmin an hre lo a ni.

Amaherawhchu, Court chuan an thutlukna siam hian inkhaihlum chungchang ngaihtuahna leh theihna a tih tawp vek loh thu an tarlang nghal a. Inkhaihlumna hmanga hremna hian India Danpui a kalh em tih chu-scientific, medical, finfiahna tha zawk a awm a nih chuan ennawn leh theih a nih thu an sawi. Constitutional interpretation hi scientific knowledge leh constitutional principles te inthlak rualin thil thang zel tur a ni tih court chuan a tarlang bawk. Tin, Court chuan thi tura inhremna atana inkhaihlum ni lo hman hian thiam loh chantir tak te zahawmna leh tul lova na an tuar nasa lutuk tur tih ziaawm dan dang a awm thei em tih zir chiang turin sorkar laipui chu a ti bawk.

He ngennaah hian inkhaihlum chu hmanlai thil a nih tawh thu leh, nung dama awm tura dikna chanvo chhungah hian zahawm taka thi tura dikna chanvo pawh a tel tih a tarlang. Central Government chuan Court hnenah hian he thil hi a zir chiang mek a ni tih a hrilh a. Project 39A pawhin Court hmaah hian thu thehlutin, inchiu hlum hi a hlawhtling pumhlum bikin a lang lo tih a tarlang bawk. Chuvangin Supreme Court chuan heng dilnate hi hnawl mah se, Sorkar chuan dan lama mithiam, forensic medicine, neuroscience, criminology leh a kaihhnawih te awmna expert committee te chu  thi tura hremna atana hmanraw hman tur tha zawk a awm theih leh theih loh zir chiang turin a ti bawk. He thubuai hi Rishi Malhotra v. Union of India-a ni(www.jclalnunsanga.in)