The Mizo Chiefs Council-te chuan Supreme Court-ah sawrkar laipui chu kum 2014 khan a khing a. He thubuaiah hian Mizo Lalte chuan an chanvo neih thin pek let emaw, zangnadawmna pek an dil a ni. He thubuai Mizo Chief Council Mizoram Thr. President Shri L. Chinzah v. Union of India & Ors., WP(C) 22/2014 hi hun rei tawh tak Supreme Court hian a ngaihtuah tawh a.

The Mizo Chiefs Council, Lal 309 awmna te chuan Assam Legislative Assembly-a, The Assam Lushai Hills District (Acquisition of Chief’s Rights)Act, 1954 siam anih hnua an chanvo leh dinhmun tha an hlauh tak avangin Court-ah an zual ko a. An thuneihna leh an ram te chu laksak an nih avangin Mizo Lalte hi ram nei mumal lo in an awm a. Mizo Lalte hian tun hmaa an dinhmun pek let an nih dawn loh chuan vbc 500 zangnadawmna (compensation) pe turin court ah hian an dil a ni.

Mizoram sawrkar chuan Mizo Chiefs (Lal) te thilphut chu tawm puiin Supreme Court-ah Affidavit an thehluhsak a; amaherawhchu, zangnadawmna pe tura an phut hi a tam tham avangin khatih hunlaia Mizoram sawrkar, Indian National Congress (INC), Pu Lalthanhawla kaihhruai sawrkar chuan zangnadawmna chu sawrkar laipui(central government) pek tur zawk a ni tiin Supreme Court ah hian an tang.

He thubuai, WP(C) 22/2014 hi ni 31, August 2025 khan hearing hnuhnung ber neih a ni a. He thubuai hi Supreme Court Judge, Justice JB Pardiwala leh Justice Mahadevan te’n an ngaihtuah a. Hemi ni hian Arguments (Inhnialna) te neih zawh a ni a. Supreme Court chuan ukil te chu written submissions ( thubuai neih te, dan leh dun inghahna te leh finfiahna etc. inziahna) karhnih chhung a pe turin a ti a. He thubuai hi Supreme Court chuan ngunthluk taka ngaihtuaha, thlirna zau zawk te nei a thutlukna siam a tum a, Supreme Court thutlukna siam theih hun tur hi hriat a la ni lova, nghah mek a ni(www.jclalnunsanga.in)

(He case Mizo Chief Council Mizoram Thr. President Shri L. Chinzah v. Union of India & Ors., WP(C) 22/2014-ah hian Mizo Chief Council tan hian Kedar Nath Tripathy, AOR leh Adv Lalremsanga Nghaka te an ding a; Union of India tan Arvind Kumar Sharma, AOR, Attorney General for India, R Venkataramani leh Solicitor General, Tushar Mehta te an ding a ni, Mizoram Sawrkar tan Advocate General Biswajit Deb leh Annando Mukherjee, AoR te an ding.)