Digital news platform The Reporters Collective leh Journalist Nitin Sethi tang dun chuan Digital Personal Data Protection Act, 2023 hnuaia provision-te chu sawiselin, Supreme court-ah an challenge. Thubuai thehluttu te hian nikum November thlaa notify tawh, Digital Personal Data Protection Rules 2025 provision-te chu an challenge nghal bawk .

Thubuaia an tarlan danin, DPDP Act hian Right to Information Act,2005 hnuaia langtlang taka kaldan hmang (transparent framework) chu nasa takin a tih chau thu leh, mimal chanchin puan chhuah lohna atana inawlna (exemption) zau tak a siam a ni,tiin an sawi a.

Thubuai thehluttute sawi danin, RTI Act Section 8(1)(j)-a amend na DPDP Act Section 44(3)  hian a hmaa mipui hlawkna(public interest/activity) emaw a inzawm thu a niha mimal chanchin puan chhuah theihna dan chu a paih an ti a. Sawrkar thar chuan mipui leh vantlang tana hlawkna tur pawh ngaihtuah lova, mimal chanchin puan chhuah chu a khap vek a ti a. Mipuite leh vantlang tana langtlang taka thu an hriat theihna tur dikna chanvo a rap bet a ni an ti.

He thubuaiah hian journalist leh transparency activist te chuan thil dik lo, eirukna, emaw conflict of interest pholan nan an mamawh fo tih a tarlang a. Hemi bakah hian provision thenkhat chuan digital search atthlak tak tak chu phalsakin, mimal data  fawm khawm leh chhek khawl a phalna chuan Article 21 a bawhchhiat a. Section 36 chu dan mumal ni lo tiin, India Danpui hnuaia Article 14 leh 19 a bawhchhia an ti bawk a ni.

Thubuai thehluttute hian DPDP Act,2023 pumpui- a bikin Section 5,6,8,10,17,18,19,36 leh 44(3) chuan India Danpui hnuaia Article 14,19 leh 21 a bawhchhia an ti a. Digital Personal Data Protection Rules, 2025 hnuaia provision eng emaw zat chu dan kalh tiin an challenge bawk a ni.

National Campaign for Peoples’ Right to Information (NCPRI) pawhin Digital Personal Data Protection (DPDP) Act kaltlanga RTI Act Section 8(1)(j) amendment challenge na chu an lo thehlut tawh bawk a. He thubuaiah hian Advocate Prashant Bhushan leh Rahul Gupta an ding a ni (www.jclalnunsanga.in)

(He thubuai hi The Reporters Collective & Anr Vs Union of India & Ors, WP(C) No.177 of 2026 a ni a. Advocate Apar Gupta, Muhammed Ali Khan, Indumugi C leh Naman Kumar-ten Abhishek Jebaraj, AoR kaltlanga an thehluh a ni).