Supreme Court chuan Uttar Pradesh police constable hlui, Kailash Chandra Kapri laka kum 35 zet kal tawh thubuaite chu a thiat a. Court a thubuai ngaihtuah rei lutuk chu Article 21 hnuaia dikna chanvo pawimawh tak, "Thubuai rang taka chinfel" (speedy trial) bawhchhiatna a nih thu an sawi.

Justice JB Pardiwala leh Justice Ujjal Bhuyan-te chuan tumah hi chhan tha tak awm lo leh hun rei lutuk chhung thubuai awrh tira tih hrehawm tur an ni lo tih an sawi a. Court chuan thubuai chinfel thuai theihna dikna chanvo hi, lung inah an tang emaw, bail-in an chhuak emaw, an thil tihsual a len leh tet lam thlir lovin a inan vek thu an sawi bawk.

Thubuai Lo Intan Dan

He thubuai hi kum 1989 a police mess chungchanga police-te inkara inhnialna atanga lo chhuak a ni a. FIR-ah chuan buaina siam, mi hliam, vau leh Railways Act bawhchhiatna thilahte puh an ni a. Court chuan he thil hi thil ho tham tak, chaw chungchanga an inhnialna atanga chhuak a niin a ngai a. Chargesheet thehluh ni tawh mah se, kum 20 chuang zet court a thubuai la ngaihtuah a ni a. Pawikhawihtua puh zinga pahnih chu an thi tawh a, a dang pahnih erawh chu kum 2023 khan thiam loh chantirna tur hriatpuitu (witness) pakhat mah police lamin-in court a an hruai theih loh avangin thiam chantir an ni tawh thung.

Court Thutlukna

Supreme Court chuan FIR an ziah luh lai khan Kapri hi kum 22 chauh a la nih thu leh, Court a thlen meuh chuan kum 59 a tlin tawh thu a tarlang a. Kum 35 chhung zet "pawikhawihtua puh” a case neih reng chu mimal zahawmna, hmingchhiatna, rilru hreawmna leh sum leh pai lama harsatna nasa tak thlentu a nih thu a sawi.

Hussainara Khatoon case leh A.R. Antulay case-te tlawhchhanin, Court chuan thubuai rang taka chinfel hi mihring dikna chanvo (human right) a nih bakah, rorelna dik neih nana thil pawimawh hmasa a ni tih a sawi nawn leh a. A tawpah chuan, he thubuai kalpui reng hi inrahbehna leh dan leh hrai hman khawlohna a ni tiin, a titawp ta vek a ni(www.jclalnunsanga.in)

(He thubuai hi Kailash Chandra Kapri vs State of Uttar Pradesh a ni)