Supreme Court chuan  ni 12, November khan rorelna dik leh fim kenkawh a nih theih zawk nan High Court zawng zawngte chu judge tinte thutluk (judgment) puanzar leh puanzar tura buatsaih mek te chhiar leh en theihna tur  online a siam turin a rawt.

Thiam loh chantir te High Court a an zualko na ngaihtuah a nih tawh hnu a, thutlukna siam rei a nih avanga hemi case hi Supreme Court hial thlen phah a ni a.

Justice Surya Kant leh Justice Bagchi-te thutna bench chuan Judge thutluknate chu  mipuite en theih tura dah a ngaih thu a sawi a. Court chuan dashboard-ah hian thutlukna thla 6 lai khek tawhte, tihkhawtlai a nih hnua puan chhuah tawhte leh puanzar a nih hnua upload tura hun an hmanzat te chu tarlang turin a ti a ni.

Jharkhand High court-a thutlukna puang chhuah har thei lutuk chungchanga thubuai an ngaihtuah mek laiin he rawtna hi he bench hmaah hian siam a ni a. A hmain January ni 31 hmaa thutlukna  khek (reserve) tawh, mahse May ni 5,2025 a la puanzar lohte report chu thehlut turin High court-te chu hriattir an lo ni tawh a. High court thenkhat te chuan zawmin affidavit an lo thehlut tawh a, a then erawh chuan an la thehlut lo a  ni. Supreme Court chuan Registrar General te chu thehluhna hun atan kar hnih a pe a. Chumi hun chhunga an thehluh loh a nih chuan a mimala inlan turin an koh tur thu a vaukhân a ni

Amicus Curiae Fauzia Shakil-i report enfiah a nih hnuah  court chuan thupek thar a tichhuak a. High Court zawng zawngte chu heng thuah hian affidavit thehluh vek turin a ti a-

(1) Thutlukna puanzar, khek leh upload dana kalphung awmsa.

(2) January ni 31, 2025 atanga October ni 31, 2025 thlenga thlenga thutlukna khek, puanzar tawhte leh upload nite chanchin chipchiar tak.

High court-te chu mipuite tana awlsam zawka  thutlukna en leh chhiar nuam zawka dah theihna tura rawtna siam turin a ti a. High court hrang hrangten kalphung inang an zawm/ neih theih dan turte leh vantlang hriata thutlukna  dah avanga Highcourt buaina hma chhawn tura an hriatte chu thehlut tel nghal turin a ti a ni.

Supreme Court chuan High Court-te chu kar li hun chhung thehluhna hun a pe a. Registry chu High court atanga report an dawngte chu Amicus Curiae hnenah pe turin a hrilh a.  January ni 28, 2026-ah heng thute hi ngaihtuah chhunzawm leh turin a ruat nghal a ni (www.jclalnunsanga.in).

(He thubuai hi WP(Crl) No. 169 of 2025, Pila Pahan @Peela Pahan & Ors Vs State of Jharkhand & Anr niin  Amicus Curiae hi Ms. Fauzia Shakil, AoR a ni).