POCSO Act ah “Romeo - Juliet” Clause Siam Turin

Tun hnai khan India ram court hrang hrang-ah POCSO Act hnuaia “Romeo-Juliet clause” ti a an phuah, tleirawl inngaizawngte’n mipat hmeichhiatna an lo hman a, hriatthiam theihna dan chungchang an ngaihtuah nasa hle a. He dan hi siam a nih chuan tleirawl innngaizawngte’n, an pahnih remtihnaa, mipat hmeichhiatna an lo hmang anih pawhin POCSO Act hnuaiah hriatthiamna a awm thei dawn a ni.

Tun dinhmunah chuan kum 18 hnuai lam chuan remtihna pe pawh ni se, an remtihna chu danin a pawm lova, POCSO Act hnuaiah hrem theih a ni. Tuna dan dinglai hnuaiah hian tleirawl inhmangaih tak te chuan, an pahnih remtihna ngeiin mipat hmeichhiatna hmang pawh ni se, hrem theih an ni a. Kum tlinglo hmeichhe chhungten thubuai an thehluh avangin kum tling lo mipa jail tang an awm phah thin a ni. Nimahsela, POCSO dan siamtu sorkar lam erawh chuan remtihna pe theitu kum chu 18  ni turin thlawp tlat thung.

‘Romeo and Juliet clause’ rawtna a rawn awm leh nachhan:

Supreme Court chuan January 9,2026 khan Allahabad High Court in POCSO Act,2012 hnuaia thubuai ziah luh zawng zawngah medical test hmang a kum endikna nei tawh tur tih chu a pawmpui lo a. He thubuaiah hian hmeichhe naupang kum 12 mi nu chuan a fanu chu an in atanga ruk bo a nih thu a sawiin FIR a thehlut a. High Court chuan a tuartu kum chu ama sawi dan leh school records hrang hranga a kum inziahna dan chu a inlan loh nuaih avangin  thil tisualtu a puh chu a chhuah zalen a. Tin, POCSO case zawng zawngah chuan a tuartu kum zat chu medical test hmanga endikna nei zel tawh turin a ti bawk.

Justice Sanjay Karol leh N. Kotiswar te thutna bench chuan POCSO Act chu hman sual a nih tawh loh nan “Romeo and Juliet” clause siam turin a ti bawk, hei hian naupang te chunga hursualna a ven mai piah lamah, tleirawl inngaizawngte inkara criminal case awm tur a veng ang tiin an sawi.

Zirchhianna atanga a landan:

Data  hrang hrang atanga a lan danin, POCSO thubuaiah hian tleirawl inngaizawngte inkara thil thleng a tam hle a. Kum 2018-2022 inkara an mi man zawng te zingah hian, POCSO Act hnuaiah- kum tling lo 6892 (16-18 years) an man a, pawngsual(rape) kaihhnawih hrang hrang dan hnuaiah- kum tling lo mi 4924 an man bawk. An man zawng zawng atangin mi 1323 in thiamloh an chang ni a tarlan a ni a. Tin, kum 18-22 inkarah hian mi 76,777 an man bawk, hei hi POCSO hnuaiah 68.4% a ni. Zirchianna atanga a lan danin thil tisualtu a puh zing a 22.9%  hi an a tuartu hmelhriat hnai (chhungte, thenawm, zitirtu etc) an ni a,  18% hi innngaihzawngte inkara thleng niin, POCSO case 4 zelah 1 chu innngaihzawngte inkara thleng a ni. Heng innngaihzawnna atanga POCSO case awm zawng zawng atanga 82% ah hian a hmeichhia te chuan mipa chu an tan tlat thin a, an chhungte case ziahluh a ni tlangpui. Hei hian tleirawlte chu tul lo taka hrem an nih thin zia a tarlan thu court chuan an sawi.

India ram dan hnuaia remtihna pe theitu kum  thlak danglam dan:

            •           1860- 10 years

            •           1891- 12 years

            •           1925- 14 years

            •           1949-16 years

            •          2013 hnuah- 18 years te a ni.

‘Romeo and Juliet’ clause chungchanga thlirna hrang hrang te:

Tun dinhmunah chuan POCSO Act siam tha tur hian amendment bill chhawp chhuah a la awm lova, nimahsela, judiciary lam atangin nawrna erawh a tam tawh thung. Sorkar lam erawh chuan naupang vehimna danah misual tam takin remchanna an zawn phah thei tiin an duh lo hle thung. POCSO Act-in a tum ber chu naupang te hursualna kawnga venhim an nih theih nan leh thil tisualtu te hrem an nih theih nan a ni a. Nimahsela, he dan hnuaiah hian tleirawl kum inthlau lo tak tak inngaizawng a, mahni duh thu ngei a mipat hmeichhiatna hmang te pawhin hremna an tuar tel thin a, an hma hunin a tuar a, innei zui ta te pawhin hna hmuh kawngah harsatna an tawh phah thin a ni.

Justice BV Nagarathna chuan tleirawl hmeichhia leh mipa inngaizawng inhmangaih em em te chu, hmeichhe chhungte’n POCSO case an thehluh avangin jail-ah mipa tang ta se, hmeichhia chuan hreawmna nasa tak a tawk dawn ani, tiin a sawi a. Bench chuan dik taka an inngaihzawnna chu dan lo anga ngaihsakin hrem an nih phah thin an ti bawk.

Supreme Court chuan Sawrkar laipui Law Secretary hnenah POCSO Act thil tum, naupang hursualna kawnga venhimna tih che lova tleirawl kum 18 la tling lo te tana policy ngaihtuah turin a ti bawk(www.jclalnunsanga.in).

(He thubuai The State of Uttar Pradesh vs. Anurudh & Anr. ah hian UP sorkar tan,AOR Ruchira Goel, Adv. Sharanya leh midangte an ding a. A leh lam tan Adv. DS Parmar, Adv. Saurabh Singh leh ukil dangte an ding)