National Council of Churches In India Chuan Anti- Conversion Laws State 12 Chhunga Hman Mek Dodalna Supreme Court-ah A Thehlut

Ni 2, February 2026 (Thawhtanni) khan National Council of Churches In India te’n India ram State sawm pahnih a Anti Conversion Laws hman mek dodalna Supreme Court-a an thehluh chu ngaihtuah a ni. He thubuai hi Division Bench, Chief Justice of India, Surya Kant leh Justice Joymalya Bagchi te  thutna Bench-in an ngaihtuah a. He thubuai hi judge pathum thutna Bench a ngaihtuah chhunzawm tura tih niin ni 20 March, 2026-ah ngaihtuah chhunzawm  leh  tur a ni.

Thubuai-a State 12 te:

Division Bench, Chief Justice of India, Surya Kant leh Justice Joymalya Bagchi te chuan India ramchhung State hrang hrang a Anti-Conversion Laws kaihhnawih buaina te chu zawmkhawma, ngaihtuah tlan turin an ti a. He thubuaiah hian State hrang hrang 12: Odisha, Chhattisgarh, Madhya Pradesh, Arunachal Pradesh, Gujarat, Himachal Pradesh, Jharkhand, Uttarakhand, Uttar Pradesh, Karnataka, Haryana, leh Rajasthan te  Anti-Conversion Laws hman mek chu dodal a ni. Nikum 2025, December thla  khan Supreme Court chuan Catholic Bishops' Conference of India te’n a Rajasthan Prohibition of Unlawful Religious Conversion Act, 2025 an khinletna kaihhnawiah hriattirna a lo pe chhuak tawh bawk.

National Council of Churches In India (NCCI) hnuaia awm te:

National Council of Churches (NCCI) hnuaiah hian Kohhran 32, Regional Christian Councils 17, All India Organisations 18 leh  a kaihhnawih Agency 7 te an tel a. NCCI hnuaiah hian India mi 14 million chuang an awm tihna a ni.

NCCI thu thlen te:

Anti-Conversion Laws chhunga “conversion", "allurement", "inducement" leh "undue influence" hrilhfiahna te chu a chian loh thu te, a hrilhfiahnain a huam zau lutuk avanga thil dik lo tak tak pawh tih theih a nih phah thute an thlen a. Mimal zalenna a rah beh thu te leh mimalin a sakhaw duh zawng huaisen taka a sawi leh thlawp theihna a dal thu te an thlen bawk. Mimalin sakhaw danga a inleh dawn a chhuichianna nasa tak neih hmasak leh thuneitute hnena insawifiahna neih a nih hian mimalin a sakhaw duhzawng a zawm theihna te, a zalenna te leh a mimal thil te rahbehna a ni tiin an thlen.

He dan avang hian pawisawi lo tam takin an tawrh tawh thu te leh rinhlehna tur dik leh chiang tak awm lo chung pawh a thubuai ziahluh a nih thin thu te an sawi a. Thubuai chhuinaa dan innghahna dinglai: “Mi tupawh dan bawhchhiaa puh anih chuan a bawhchhe ngei a ni tih chu a puhtu te’n an finfiah tur a ni” tih chu he dan hnuaiah chuan thlak danglam daih a nih thu te, “Dan a bawhchhia a ni tih chiang tak a fiahfiah anih hma chu pawisawilo anga ngaih tur” tih te chu he dan hnuaiah chuan awmzia a neih loh thu te an thlen bawk.

Thubuai thehluttu ukil hian Anti-Conversion Laws hrang hrang te chu thubuai ngaihtuah a nih chhung hian Stay (hman loh hrih) tura dilna a thehlut tel a. Hemi chhung hian Anti-Conversion Laws hnuaiah police te chu tumah man lo turin leh Section 3 & 5 hnuaia FIR thehluhte pawh bawhzui lo tur a kaihhruaina pe chhuak turin ngenna a thehlut tel bawk. (www.jclalnunsanga.in).

(He thubuai National Council of Churches in India vs State of Rajasthan and Ors.W.P.(C) No. 98/2026 ah hian thubuai thehluttu tan  Senior Advocate Meenakshi Arora leh AOR Niharika Ahluwalia te an ding) 

Dan lam kaihhnawih thutharte hi Whatsapp Group siamin update kan post thin a. Hemi Groupa i awm ve duh a nih chuan hemi link-ah hian lo join ve turin kan sawm a che. https://chat.whatsapp.com/BEZzj5EzMLCBEQjtWYRFug?mode=gi_c emaw https://chat.whatsapp.com/DMaRfCsAQimCo6fLFyYNuS?mode=gi_c