Supreme Court chuan ni 20, May 2026 khan sorkar laipui leh State sorkar zawng zawngte hnenah sorkar legal panel leh law officer hna hrang hrangah hmeichhe ukilte tan a 30% tal reservation siamsak dilna chungchanga PIL thehluhah lehlam insawi thiamna hun a pe. He dilna hi Ladli Foundation Trust thehluh niin, Chief Justice Surya Kant, Justice Joymalya Bagchi, leh Justice Vipul M. Pancholi te Bench chuan an ngaihtuah a. Senior Advocate Vikas Singh chuan Supreme Court Bar Association te'n a zirchianna an neih chu tarlangin, ukil hmeichhiate chu legal panel-a telh an nih pawhin, case pek an ni ngai mang lo tih a sawi a. Hemi avang hian case an neih ve ngei theih nana kalphung neih a ngaih thu a sawi. He ngennaah hian High Court panel-ahte, sorkar law officer hna hrang hrangte, leh Central leh State Government empanelment-ahte ukil hmeichhiate tana reservation siam a dil a ni.

Hmeichhiate chuan law school-ah te kalin, dan lam zirchhuak chu pungchho zelin ukil hna te thawk mah se,hna pawimawh tak tak hmeichhiate dinhmun chu a hniam hle tih a tarlang a. He ngennaa tarlan danin, India rama ukil zawng zawng zingah hian hmeichhia chu15% vel chauh an ni a. Zalenna kan hmuh hnuah Attorney General emaw Solicitor General of India emaw tura hmeichhe ruat an la awm miah lo tih a tarlang bawk. Senior Advocate Monika Gusain chuan Court hnenah Haryana sorkar chuan Senior Additional Advocate General atan hmeichhia an la ruat ngai lo tih a hriattir a. Sorkar law officer hmeichhia thenkhat chuan hlawh (stipend) an hmuh thin laiin, thla tam tak chhung case pakhat pawh pek an ni ngai lo tih Court hi hriattir a ni bawk. Bench chuan hemi kaihhnawiha pawl hrang hrangte chu data leh thil hriat ngai te chu chiangkuang zawk court-a thehlut turin a hriattir.(www.jclalnunsanga.in)

(He thubuai hi Ladli Foundation Trust vs Union of India & Ors niin, thubuai thehluttu tan hian Mudit Gupta AOR, Sr. Adv. Vikas Singh, Adv. Varun Singh leh ukil dang te an ding a ni)