1. Consumer tu nge? : India ramah hian consumer-te dikna humhalhna chu Consumer Protection Act, 2019 hmangin kalpui a ni. Section 2(7) Consumer Protection Act, 2019-in Consumer tih a sawi chu mi tupawh:

(i) Bungraw leitu, a man pek tawh emaw, pek tiam emaw, instalment-a sum pek emaw, hun lo la thleng tura pek tura inremsiamna (deferred payment) hnuaia lei tawh phawt chu consumer an ni a. Hemi chhungah hian a leitu phalna/remtihna thlapa chu bungrua lo hmangve-tu (user) pawh a tel a ni. Mahse hmun danga hralh chhawn (resale) tur emaw, sumdawnna lian tham (commercial purpose) atana lo latu erawh chu a huam lo thung.

(ii) Sum pek tawh, pek tiam tawh, a then pek a, a then pek tiam, emaw instalment-in sum pek dan (deferred payment system) hmanga sum pek tur awm bawk siin service eng emaw hire emaw hmangtu emaw a ni a. Chutiang service hire emaw hmangtu emaw ni lo mahse, service hire emaw hmangtu hmasa ber phalna angin chutiang service chu hmangtu (beneficiary) pawh a huam tel a ni. Mahse, sumdawnna liamtham (commercial purpose) atana service hmangtu chu a huam lo thung.

Consumer tih chu sum pe-a thil lei emaw, a man pe-a service hmang emaw a ni tlangpui.

2. Consumer Commission-a thubuai thehluh dan : Thil leitu emaw hmangtu (Consumer)-in a thil leiah emaw a hmanna kawngah buaina leh lungawilohna a neih chuan Consumer Commission-ah thubuai (complaint) a thehlut thei a ni. Consumer Commission -a kan luh hmain a hnuai ami ang hi tih hmasak theih chuan thil tangkai tak a ni.

1.   Thil hralhtu emaw service petu hnenah complaint siam hmasak a tha. Invoice, warranty card, receipt leh complaint number te vawn that tur.

2.   Ziaka dilna Consumer Commission -ah theh luh tur a ni a. Company emaw dawr neitu emaw service petu hnenah thil thalo/diklo siam that emaw thlenglet emaw pek kir emaw zangnadawmna dilna ziakin Consumer Forum ah theh luh hmasak tur a ni.

Kan thil leina emaw dawr neitu emaw sevice petu ten kan lungawina tawk chhanna min pek loh chuan consumer commission ah thubuai thehluh theih a ni a, kan thubuai chu kan thil lei hlut zawng emaw sevice min pek dan hlut zawngah hian Consumer Commission hrang hrangah theh luh theih a ni. District Commission (District tinah), State Commission (Tuikhuahtlang, Aizawl) leh National Commission (Delhi) te a awm a ni.

Thubuai thehluhnaah chuan engte nge ziah tur?

●      Thubuai theluttu (Complainant) hming, mobile number leh address.

●      Kan khinte (shop, company, service provider) hming leh address.

●      Thil lei emaw service hman chungchang.

●      Dik lohna thlen dan leh ni.

●      Thubuai thehluttu (Consumer)-in a tawrhna leh a thil chan te.

●      In pekkir (Refund), Inthleng (replacement), Zangnadawmna (compensation) emaw kan thil dil duh dang (relief) tarlan tur.

●      Finfiahna (Evidence) leh lehkha pawimawh (supporting documents).

Thubuai theihluh theih hun chhung: Consumer complaint chu thil kan lei emaw service min pek atanga kum 2 chhungin thehluh tur a ni a. Mahse hun tiam chhung a ral tawh chuan chhan tha tak a awm chuan a hun taka thubuai theh luh a nih lohvanga hriatthiam dilna (delay condonation) dilna thehluh a theih a ni bawk.

3.   Court fees pek tur zat: Consumer Commission-ah complaint file-na fee chu thil lei emaw service hman man zat (consideration paid) a zirin a danglam.

A chunga fees hi chu thubuai thehluhna fees chauh ani a, Advocate I rual anih chuan Advocate fee chu a hrana chawi leh a ngai dawn a ni.

4. Consumer Court thuneihna : Consumer Protection Act, 2019 hnuaiah Commission pathum a awm a, chungte chu:-

1.District Consumer Commission: District Consumer Commission hian Cheng nuai 50 chin hnuai thubuai te chauh a ngaihtuah thei.

2. State Consumer Commission: State Consumer Commission hian cheng nuai 50 atanga cheng vaibelchhe 2 inkar thubuai a ngaihtuah thei.

 3. National Consumer Commission : National Consumer Commission hian cheng Vaibelchhe 2 chunglam a ngaihtuah thei a ni.

Heng Consumer Commission-in chinfelna a pek theihte:

1)     Thil thalo (defect) awm siam thattir.

2)     Thil thalo (defect) awm thlak sak.

3)     Thil man pek let leh.

4)     Service tha lo chin fel.

5)     Thil chan emaw hloh tawh avanga compensation pek.

6)     Thil kalpui dan diklo tih tawp tir.

7)     Thil hlauhawm tak hralh leh tih tawp tir leh a dangte.

5. Consumer Court kaldan : Complaint file a nih hnuah a tlangpuiin heng kalphung te hi a awm.

Step 1 – Thubuai thehluh: Thil leitu/hmangtuin thubuai a thehlut anga, thubuai thehluhah chuan lehkha pawimawh tul ang angte leh court fees a thil tel ang.

Step 2 – Pawmtlak a nih leh nihloh enna: Commission-in complaint thehluh chu pawmtlak a ni em tih a lo en ang.

Step 3 – Company/dawr neitu/service petu hnena hriattirnna pek:  Complaint pawm a nih hnuah Company/dawr neitu/service petu te hnenah notice thawn a ni anga, chhanletna thehluhna hun pek a ni ang.

Step 4 – Finfiahna hmanga in khinna (Evidence leh hearing) : Thubuai theluttu leh a khin te chuan finfiahna chi hrang hrang heng, invoice, receipt, expert report leh thil pawimawh dangte hmangin an in khing anga, thuhretu (Witness)-te pawh consumer court-ah hruai tur a ni.

Step 5 – Inremsiamna (Mediation): A remchan chuan Party-te inrem theihna a awm chuan mediation hmangin buaina chinfel theih a ni bawk.

Step 6 – Thu tlukna: Finfiahna leh thuhretu te thusawi atang leh thubuai thehluttu leh lehlam ten ziaka an tanchhan consumer court-a thehluh te hmangin thubuai remtu chuan uluk takin a ngaihtuah a, finfiahna hrang hrang atangin thuremna/thutlukna a siam thin a ni.

6. Court thuremna a lungawilohna (Appeal) thehluh dan :- Commission order-a lungawi lohna a awm chuan Commission sang zawkah appeal thehluh theih a ni.

●      District Commission order laka appeal chu State Commission-ah thehluh tur a ni.

●      State Commission order laka appeal chu National Commission-ah thehluh tur a ni.

●      National Commission order laka appeal chu Supreme Court-ah thehluh theih a ni.

Appeal hun chhung chu a tlangpuiin District leh State Commission order atan ni 30, National Commission order atan ni 45 a ni.

7. Legal awareness atan hriat reng tur

1.   Thil lei dawnin bill emaw receipt emaw lak zel tur a ni, pdf copy a siam a dah that a finthlak.

2.   Warranty leh guarantee document te vawn that tur a ni.

3.   Online shopping-ah payment proof leh order details dah that tur a ni.

4.   Thil thalo/diklo (defect) awm emaw service tha lo emaw a nih chuan company hnenah ziakin complaint thawn hmasak tur a ni. Customer care mail ah thawn a finthlak, record a awm thei zel a.

5.   Consumer complaint hun hi kum 2 a ni tih hria la, a hun taka complaint file tum tur a ni.