Ni 23, July 2026 (Ningani) khan Delhi High Court chuan NEET paper leak kaihhnawih thubuai ngaihtuah turin Rouse Avenue Court-ah fast track court a din a, he court-a thu tur Special Judge atan hian Delhi High Court Chief Justice, DK Upadhyay chuan Judge Anu Grover Baliga a ruat bawk.

Ningani zing khan Prime Minister Narendra Modi chuan NEET paper leak chungchanga pawikhawihtute rang zawka hrem an nih theih nan fast track court siam anih tur thu social media X-ah a post a. Hemi hnu hian Judge Anu Grover Baliga hi NEET paper leak kaihhnawih thubuai ngaihtuah tur hian ruat a ni ta a ni.

Judge Anu Grover Baliga hi South-East District a, District Judge (Commercial)-04 hna a chelh mek a. Judge Anu Grover Baliga hi kum 1969-ah a piang a, kum 2000 khan Delhi Judicial Service-ah tlingin, Tiz Hazari court-ah civil judge a hna a thawk a. Kum 2010 khan Dwarka-ah Additional District Judge niin Delhi Higher Judicial Service (DJHS)-ah a lut leh a, kum 2029-ah a pension dawn a ni.

NEET UG-2026 exam paper leak chungchanga Minsitry of Education hnuaia Department of Higher Education te’n thubuai an thehluh hnuah, CBI chuan May ni 12 khan thubuai an ziak lut a. Hemi hnu hian mi 13 man an ni tawh a. Heng an mi man te hi State hrang hrang Delhi, Jaipur, Gurugram, Nashik, Pune leh Ahilyanagar nena inkungkaihna nei an ni.

CBI hian criminal conspiracy, fraud, breach of trust, Prevention of Corruption Act leh Public Examinations (Prevention of Unfair Means) Act, 2024 hnuaiah te thubuai an ziak lut a. Tin , Delhi Court-a Special Judge Ajay Gupta chuan CBI te’n an dilna angin, Manisha Sanjay Havaldar Specimen signature dang lak belh leh chu a remtihsak bawk(www.jclalnunsanga.in)