IndiGo In Nasa Tak A Thlawhna An Cancel Chungchangah CCI In Chhuichianna Nei Turin Thupek A Chhuah

Nimin ni 4, February 2026 (Nilaini) khan Competition Commission of India (CCI) chuan ni 3-5 December, 2025 inkara InterGlobe Aviation Ltd. (IndiGo Airlines) in nasa tak a thlawhna an cancel leh tihkhawtlai chungchangah chhuichianna kalpui turin thupek a chhuah. He thubuai hi passenger pakhat, Karthikeya Rawal thubuai thehluh atanga lo intan a ni.

IndiGo hian ni 3-5 December, 2025 chhung khan thlawhna 2,507 an cancel thu leh thlawhna 1,852 chuang thlawhchhuah hun an tihkhawtlai thu a sawi a. He buaina hian passenger nuai 3 chuang a ti buai a. Indigo chuan hemi hunlai hian a thlakna tur thildang an ngaihtuahsak loh thu a sawi a, zinkawng ngai rengah pawh ticket man chu a hma aia sang tak tak an bituk thar thu sawiin, Indigo chuan an lansarhna an hman sual thu a sawi a ni.

DGCA data atanga a landanin IndiGo hian India ramchhunga thlawk kual thin passenger 60–63% chu an phur thin a. Zinkawng 330 chuangah IndiGo thlawhna chiah thlawk a awm bawk a ni. Hei hian India ramchhunga thlawhna thlawk kual thin zingah an thlawhna chu a len ber thu leh langsar tak a nih zia a tihchian thu CCI chuan a tarlang a ni. IndiGo hian an puhna ang a an lansarhna leh lenna chu hmang sual a, mipui te chunga dik lo taka an che tih finfiah a nih chuan dan ang a hmalak theih a nih thu CCI chuan a sawi.

CCI chuan  IdiGo hian an lansarhna an hmang sual ngei niin an hmu a, hemi avang hian CCI chuan Director General chu chhuichianna kalpui turin leh ni 90 chhunga report thehlut turin a ti bawk(www.jclalnunsanga.in).