Hawng 440 Avanga Man Henry-A Bail In Chhuak Lo, An Puhna An Pawm lo.

• Oct 28, 2025
• JC
• Share

Heroin hawng 440 man chungchang a thubuai kalzel ah Henry Lalbiakzinga Chhundeng leh a thurualpui te an puhna chu court in thutling ah a pawm sak a. Ni 24.10.2025 (Zirtawp)  khan he case kaihhnawih a man te hi court ah inlan in an thubuai chungchanga an puhna te chhiarchhuah a ni a. Thubuai neitu te erawh chuan puh an nihna hi an pawmlo thung a ni. 

Case siam sak :

March 13, 2025 zan khan Zokhawthar PS team New Hruaikawn Road-a mobile patrolling te chuan heroin hawng 440 man in Mizoram Police chuan Case No. Zokhawthar P/S No. 36/25 dt 14/3/2025 u/s 21(c)/25/29 ND&PS Act 1985 an ziaklut nghal a ni. He case kaihhnawih ah hian ni 14.03.2025 khan mi 7 man niin an zinga pakhat hi kum tlinglo a nih avang in JJB Champhai hnen ah hlan a ni. Police in an chhui zui zelna atangin ni 15.03.2025 khan mi pahnih man leh an ni bawk.

Man an nih dan : 

A mantu Police ten court a an thu thehluh (chargesheet) a an sawi dan chuan March 13, 2025 zan a Zokhawthar PS team New Hruaikawn Road-a mobile patrolling te chuan New Hruaikawn atanga Champhai pan a tlan Bike pathum leh Champhai taxi pakhat te chu thu zawhfiah tum in an tiding a. Bike a chuang te thu an zawhfiah lai in taxi hi Champhai lam pan in a tlanchhe ta a. Rangtak a umzui in engemaw chen an um hnu in an man zui ta a ni.  Thu an zawhfiah na a an sawi dan in dan phalloh thil engemaw an phur a ni tih an inpuang a. Police  ten  anlo tih din na atanga KM khat leh a chanve velah kawngsir ah an thil phurh chu an paih thu an sawi ta a ni. An inpuanna bawhzuiin police lam chuan an thil paih chu vantlang mi thuhretu te awmlai ngei a zawng in he heroin hawng 440 (Kg 4.722) hi an man ta a ni a.  An thil man hi Chargesheet a police te ziak dan chuan Rs 1,41,66,000/- man hu vela chhut a ni.

Dinthar khawtlang te lungawi lo: 

Henry a hi Dinthar khawtlang ten an vengchhung a awmzui phallo in nasa takin lungawilohna an lantir a. Khawtlang miten lungawi lohna lan tirin lirthei leh bungrua engmaw zat pawh tih chhiat a ni.  Dinthar Veng khawtlang hruaitute sawi dan in, ni 11.04.2025  khan heroin hawng 440 kaihhnawiha man Henry Chhundeng, Dinthar Veng, Aizawl chhungte chuan an in an chhuah san a ni.

Hremna tur : 

He ruihhlo thubuai kaihnawih a man te hi Section 21(c), 25 & 29 Narcotic Drugs And Psychotropic Substances Act (ND&PS), 1985 bawhchhia a puh an ni. Section 21(c), ND & PS Act 1985 hi a hremna naber niin thiamloh chantir annih chuan, Kum 10 aia tlem loh leh kum 20 thleng lung in tan theihna a nih bakah Cheng nuai khat atanga nuaih hnih thleng chawi theihna a ni. 

Bail in a chhuak em?:

Ni 24.10.2025 khan heng kaihhnawih a man te hi Pu Liansangzuala Special Judge,  ND & PS Act Champhai District-ah inlanin court in an puhna te an pawm leh pawm loh a zawt a. Thubuai awrhtu ten an puhna te an pawm  loh avang in case hi kalpui chhunzawm zel tur a ni.  Court leh hun tur atan ni 07.11.2025 ruat ani a, hemi ni ah hian sawrkar lam thuhretu koin court ah a thu hriat te  zawh fiah a ni ang. Thubuai nei mekte zing ami Henry Lalbiakzinga  hi social media platform thenkhatah bail a chhuak anga thuthang a awm a.  Pu Liansangzuala Special Judge ND&PS Act, Champhai District hian heng thubuai kaihhnawih a man te hi man zinga pakhat medical ground vanga bail phalsak tih loh chu vawiin ni thlengin  tumah bail in ala chhuah lo a ni (www.jclalnunsanga.in).