Chhungkaw Mission Statement Nei Rawh
- Oct 22, 2025
- Admin
Mizoram Public Service Commission (MPSC) in Combined Civil Service Examination result tun hnaia a tih chhuahah MCS, MPS etc Officer thar duhawm tak takte kan nei a. An hlawhtlinna chanchin hrang hrang atanga thil intawm ka lo hmuh chhuah chu hetiang ni thei tura an chhungkaw tanrual zia leh an tum - mission a an chian zia a lang. Lunglei atanga tlingte Rank 4 Lalhlimpuii Pachuau leh rank 5 Marilyn Lalruatkimi te pawh hi an sawi dan chuan in khata cheng duna (Aizawlah in an luah dun) MCS tura inbuatsaih tlang an ni. Rank 10 C John Lalmuansanga leh rank 11 Esther Lalremruati te chu Pu C Thanmawia , Venghnuai, Aizawl fate ve ve an ni a, nu leh pa enkawlna thuhmun dawng unau an ni a. Heng mite chhungkua hi an fakawm hle. A chunga kan sawi te hi chhungkhat nge nge chu an Rank pawh a in dawt chiah ve ve (Rank 4 leh 5, rank 10 leh 11) a ni. Study material in ang an hman vang emaw an inbuatsaihna in ang avang pawh a ni mai thei. Nupa te hi kan innei rei tawlh tawlh hian hmel te, rilru te pawh hi a in ang chho telh telh duh te an ti a. Thil chiang tak chu kan chenpui chhungkua in kan hma lam hun hi a hril hle a, kan chhungkua kan chenpui te hi an van lo pawimawh tak em !
I chhungkaw tan Mission Statement (Thuthlung) i nei em?
Heti khawpa chhungkua hi a pawimawh a, kan hma lam hun a hrilh si chuan in chhungkaw tan Mission Statement i nei em? Mizoramah hian pawl hrang hrang hi a tam hle a. Pawl hrang hrangah te kan inhmang a. Committee Member ah te kan awm a. Kum tirah Annual Plan/Project leh Budget te relin nilengte , zan khaw tai rek thleng ten Chhungkua kalsanin kan hun tha kan hmang thin. Chu kan pawl Annual Plan & Budget te kum khat chhunga tih hlawhtlin loh hlau reng rengin kan awm a. Chhungkaw chhuahsanin kan Committee sek thin. Kan pawl telna, keimahni awm lo pawh a kal thei tan nasa taka kan hun leh tha te senga kan Annual Plan/Project & Budget te buai pui reng renga kan awm lai hian kan tel lova awm thei lo kan chhungkaw tan hian Annual Plan & Budget te kan nei thin em? A chhe berah lo boral ta la, i telna pawlah khan nangmah aiawhtu tur an thlang /ruat leh mai thei. Mahse, i chhungkua ah chuan nangmah aiawhtu tur an awm thei tawh lo. Kan chhungkaw tan hian kum khat a tan mai ni lo, i lo awm loh hnu pawha i chhungkua hruaitu tur thuthlung - Mission Statement mumal tak i neih a ngai a ni.
Chhungkaw Mission Statement chu eng nge?:
Tuna kan sawi Chhungkaw Mission Statement han tih hian ‘chhungkaw thuthlung’ ti te pawhin a sawi theih ang. Chhungkaw Mission Statement (Thuthlung) chu kan chhungkua in kan ngaihhlut leh duh, ziak a dah a, chumi hmanga he khawvela a tha zawnga danglamna thlen a, kan chhungkaw member tin in kan hriata kan zawm reng tur a ni. Chu i chhungkaw thuthlung chuan in nitin nun theuh a khalh kal thin che u. I duh thlanna leh i ngaihhlut zawng pawh chumi chuan a hruai reng tur che a ni. I ngaihhlut zawng, i hun leh i thil neih te pawh i chhungkaw thuthlung chuan a kai hruai a. I rinna, beiseina , midangte nena in inlaichinna thlengin a siam tha a ni.
Hlawhtlinna thuruk a ni :
Chhungkaw mission statement i neih chuan i chhungkua kha eng chhungkua nge, i fate len hunah eng nge an nih dawn tih a hrilh thei. Chhungkua nghet tak ni tur chuan chhungkaw in nghahna nghet tak kan siam a ngai. Chumi tak chu chhungkaw mission statement hmangin kan ti thei. In sak dawn a, Architect Design mawi tak i neih sa a ngai ang bawkin i chhungkua kha a in nghahna tur i design a ngai a ni. Family Mission statement (thuthung) kan neih chuan Chhungkaw in hmangaihna leh in pawhna pawh a siam. Dawhtheihna leh in zah tawnna pawh a awm thei. Company lian leh pawl lian deuh mumal taka din a nih dawn te hian an dinchhan Mission Statement hi an ngai pawimawh em em thin a. An hlawhtlinna pawh nasa takin an mission statement ah a in nghat a ni.
Chhungkaw Mission Statement (Thuthlung) entirna thenkhat :
Kan hriatthiam theih nan entirna atan chhungkaw mission statement thenkhat lo tarlang ila.
1. Pathian hmangaih tlattu leh Pathian dah pawimawh bertu chhungkua, inhmangaih tawn leh midangte chunga ngilnei leh tanpui thin chhungkua.
2. Mahni intodelh, taima leh midangte tanpui a rinawm leh dik taka engkim thil tihna a tha thei ang bera tih,
3. Sum leh paia in ren chem thiam leh pawisa hmang tangkai thiam,
4. Chhungkaw ngai pawimawh, in ngaihsak leh chhungkaw tana hun in pe… etc tih lam pang ang zawng te hian kan siam thei a.
Tin, kan duh leh kan ngai pawi ang zelin chhungkaw mission statement hi kan siam rem thei a, kan siam belh thei. Zirna, hriselna, infiamna, kohhran leh khawtlang etc lam ngaih pawimawh pawhin chutiang lam chuan kan chhungkaw thutlung chu kan siam thei zel a ni. Entirnan - Ka fapa (Bawiha) hi a len hunah Doctor Super Specialist a ni ang. Kan fanu (Mamteii) hi a len hunah chuan IAS a ni ang tite pawhin kan siam thei a. Chutianga kan siam chuan kan fate kha an tet lai atangin an rilru te kan lo hnehsakin kan lo buatsaih lawk thei. An nih tur nih theihna ah pawh nasa takin a pui ngei ang. Mi tam tak hi chu tum mumal pawh nei lovin kan tum thut a, hun a lo thlem tawh thin si a. Kan nih tur kan nih theih loh phah tawh thin. Mission statement chu thui leh khun khan tak a ngai lo a. Hriatthiam awl leh chiang tak ni thei se. A pawimawh zawk chu a taka nunpui kha a ni.
Nitina hmuh leh chhiar theiha siam :
Tum khat chu Aizawl Pastor Bial Kohhran Hmeichhe Inkhawm pakhat in Chhungkaw chungchang seminar a Nexgen te min sawm tumin nu pakhatin a nun hruai tlattu a sawi chu a tet laia a mutna bula Isua thlalak leh a thu in ziak kha a nih thu a sawi a. Chu nu chuan, “Ka naupan lai hian ka mutna roomah hian Isua thlalak poster lian tak leh a hnuai saptawnga thuziak ‘ I asked Jesus, ‘ How much do you love me”’ And Jesus said, ‘This much.’ Then, He stretched his arms and died (“Engtia tamin nge min hmangaih” tiin Isua ka zawt a, Isua chuan, “ Heti zat hian” tiin a ban a phara, a thi ta a.)” tih hi vawiin thleng hian ka nunah hian Pathian min hmangaih nasat zia hi a chiang, Pathian hi nitin hian ka hlat thei lo” ti hian sharing a nei a. A fate pawh an mutna bulah Pathian thu tha tak tak poster a tarsak thin a ni. Kan chhungkaw thuthlung chu chhungkaw member tin ten hmuh theih nan mawi taka print chhuah a siam ni thei se. Tunlai ah chuan mawi taka tar theiha frame siam te pawh an awm a. Kan ngaihsan zawng leh mawi kan tih Poster te pawh kan print a, langsang takin kan sitting room-ah te kan tar thin a. Kan nun atana tangkaina nei lo te kan tar duh chuan kan dam chhung leh thih hnu pawha pawimawh kan chhungkaw thuthlung phei chu mawi taka frame a siam a, chhungtin ten awlsam taka an chhiar a , an hmuh theih tura tar hi a phu a ni. Mawi hnai taka sticker ang chi a siamin kan mutna bulah te, choka ah te, fridge bangah te, kan laptop hnungah te , kan diary/note bu ah te kan tar thei a ni.
Chhungkaw Mission Statement (thuthlung) hlawhtlinna bul pahnih :
Kan chhungkaw thuthlung hi a hlawhtlin leh hlawhtlin loh innghahna chu a innghahna (foundation) a pawimawh. Kan chhungkaw thuthlung (Mission statement) in nghahna chu “Pathian” hi a ni tur a ni. Pathian rawn chunga bul tanin nitin a hlawhtlin theih nan Pathian hnenah dil thin ila. Kan chhungkaw thutlung hlawhtlin leh tlin loh te chu a hnuai ami point hnih lian takah te hian a in nghat kan ti thei ang.
1. Pathian rinchhana chhungkaw thuthlung siam : Kan chhungkaw thuthlung kan siam dawn a nih chuan Pathian hnenah in hlan hmasa ila. Pathian rawnin Amah rinchhana tha tak kan siam theih nan finna dil hmasa ila. A tih hlawhtlin nan pawh ama rinna nghah tlat a ngai a ni. Kan family mission statement len leh len loh in kan Pathian rinna len leh len loh a hril thei ang. A saptawngin “Big mission, big God and big faith” a tih theih ang. Missionary lar William Carey a thusawi lar tak, “Pathian hnen atangin thil ropui tak beisei la, Ama tan thil ropui tak tih tum ang che” tih rilru pu chunga chhawngkaw thutlung hi kan siam chuan a hlawhtling ngei ang.
2. Pathian chawimawi nana chhungkaw thuthlung siam : Kan chhungkaw thuthlung hi Pathian chawimawi nana kan siam lo a nih chuan a hlawhtling fum fe thei lo ang. Mi ropui, officer lian leh hausa te pawh hi Pathian hre lo chu an daih rei lo a, an zinga awm a hrehawm thin. Engkim hi ama siam a ni a, ama tan leh a ropui nana siam a ni a. Amah chawimawi nan bawka a siam a ni. Pathian hian tunlai khawvelah hian Amah chawimawi duhte hi chawimawi tur a zawng ruai tawh a. Kan chhungkaw thuthlung hi Pathian chawimawi nana kan siam a nih phawt chuan tih hlawhtlin a ni ngei ang.
Chhungkaw chungchang lama thusawi leh lehkhabu ziak thin Stephen R Covey , a lehkhabu ziak ‘The Seven Habits of Highly Effective Families’ phei chu khawvela lehkhabu hralh tam ber te pawh ni thei chuan , “ I fate i pek theih hlu ber chu chhungkaw thuthlung hmanga an nun siam puitlin a, chumi chu rochun tir ve zel hi a ni” tiin a ziak. In ropui tak tak leh sum tam tak kan fate tana hnuchhiah theih ai chuan chutiang thawk chhuak ve thei tura chhungkaw thuthlung nghet hnuchhiah chu kan thlah kal zel turte tan pawh a daih reiin a hlu zawk ngei ang.
-JC Lalnunsanga(AoR, Supreme Court)
