Be There Where You Are
- Oct 17, 2025
- Admin
"Thla khat hlutna i hriat duh chuan, thla kim lova piang nau chhiattu zawt la,
Darkar khat hlutna i hriat duh chuan, a bialnu nghaktu a bialpa zawt la,
Minute khat hlutna i hriat duh chuan, rel in a tlai avanga a tlansan khualzin zawt la,
Second khat hlutna i hriat duh chuan, car in su tep khalhtu zawt rawh”
"You Can Achieve More"-Shiv Khera
Sap ṭawnga, “Be There Where You Are,” ti-a thupui kan dah kher hi ngai mawh kan awm mai thei a; mahse, a thluk hi bengah a cham bik riauvin ka hria a. He thu hian ka nun kawngah, hmasawnna thui tak min pek avangin ka thiam ang tawka han ziah ve ka duh a ni. A awmzia chu, "I awmna hmunah awm rawh," tihna mai a ni a, “I thil tih laiah i rilru leh ngaihtuahna zawng zawng pe rawh,” tiin a sawifiah theih awm e. Kan thil tih laia kan rilru kan pek leh pek loh hian kan tih ṭhat leh ṭhat loh te, kan tih sawt leh sawt loh te leh hma kan sawn leh sawn loh nasa takin a hril a ni.
Kum 1996 July thla tir lam khan, Bill Gates-a pa chuan mi pawimawh ṭhenkhat chaw eiah a sawm a. A mi sawmte zingah chuan a fapa, Microsoft dintu, Bill Gates leh mi hausa tawntaw (millionaire), Warren Buffett te pawh an tel ve a. Heng mi pahnihte hi an hausak avanga khawvel hriat lar, Forbes World Millionaires list-ah pawh dinhmun sang hauh rengtute an ni a. An chaw ei hma chuan inkawm khawmna an buatsaih a, chuta kaihruaitu chuan, “Tun dinhmun in thlen theihna atana thil pawimawh ber in tih min hrilh thei em?” tiin a zawt dun a. Warren Buffet chuan rang takin, “Thil tih laia rilru pek,” tiin a lo chhang a, Bill Gates pawh chuan rang taka, “Dik lutuk” tih pahin a lu a lo bu nghal nghut a ni.
Bill Gates hian computer lamah rilru a pe em em a, kum 13 a nih lai atangin a atchilh ṭan der tawh a. Pawl 9 a zirlai phei chuan a zirlai dang zawng zawng ngaihthah khawpa a buaipui vangin a nu leh pate chuan an manganpui a, computer khawih lovin a awm phah ta a ni. Thla 9 dawn lai computer khawih lovin a awm phah ta a ni. A bialnu pawhin amah aia computer-a rilru a pek zawk avangin an inban tih thu a sawi hial a ni.
Warren Buffet pawh hian a nih tum ber, mi hausa nih theih dan tur chu kum 10 chhung zet,atchilh khawpin a ngaihtuah a. A chanchin ziaktu, Alice Schroeder chuan, "A tet lai aṭang tawhin millionaire nih a tum bur mai a ni,” a ti. Kum 11 a nihin kum 35 a tlin hunah millionaire nih hman a tum thu a lo sawi tawh a, a tum chu kum 30 a nihin a hlawhtling der tawh a ni. Warren Buffett hian eng pawh ti dawn se, a theihna leh a rilru zawng zawng pein, a thil tih laiah a cheng ṭhin a ni.
Motor accident chhan tam ber an zirchianna pakhatah chuan driver-ten a rilru an pek loh vang a ni tih an hmu chhuak a. Hei hi driver-ten an motor khalha rilru an pek tawk loh vang a ni thei. Vawi khat chu, Tuikual chhovah hian zawi muangin car ka khalh a, ka case dinna turin ka rilru a luah em avangin ka ngaihtuah ngut ngut a. Court-a judge hma a ka sawi dan tur te, leh lamin chutiang chuan lo sawi se engtin nge ka chhan let ang tihte ka ngaihtuah kual chiam mai a. Ka ngaihtuahna hmun danga a awm daih lai chuan ka hmaa bolero chu ka hmu lo ṭep a, kan insu hman thuak a. Chu bolero khalhtu chuan vin fahran a, “Kawng en ta che,” tia min hrawk tuar chuan ka inngaihtuahna aṭang chuan min tiharh zawk a. Kha bolero nen khan lo insu ta ila, nasa taka ka ngaihtuahnaa ka lo inbuatsaih mek khan awmzia a nei dawn lo. Keimah inhliamin, damdawi inah ka awm lo a nih pawhin, ka car tal chu nilengin workshop-ah buaipui ka ngai awm si a ka ti rilru nauh nauh a. Ka car khalh laia ‘keimah’ ka awm loh avanga chhiatna nasa zawk a lo awm theihzia ka ngaihtuah chhuah phah ta a ni.
Ṭhenkhat chu, kan inkhawmte hian, kan rilru leh ngaihtuahna hmun dang daihah a lo awm ṭhin a. Inkhawm hi tih tur ni-a ngaiin, thusawituin eng nge a sawi pawh hre lo vin, biak in chhungah kan lo ṭhu ve mai mai thei. Mi pakhat chuan, biak ina a mutthluk loh nan, a thuchah ngaihthlak chu a pawimawh lai, a tam thei ang ber, ṭha takin a lo ziak ṭhin a. Chutianga a tih fo hnu chuan, tun hmaa thusawi thiam leh ngaihnawm pawha a lo ngaih lohte thusawi khan, a nun chu nasa taka a chawm thu a sawi a. A hlawkpui chhan ber ni-a a sawi chu, thusawitute khan an sawi ṭhat tak em avang ni lo vin, inkhawm laia uluk taka thusawi a ngaihthlak a, a lo ziah thlap thlap vang kha a ni. Hetiang hian kan inkhawm hian uluk takin thusawi ngai thla ila, Pathian thu hi thu nung a nih angin, kan nunah pawh nung takin hna a thawk ngei ang. Biak ina kal hi kan tih tur ni-a kan hriat avang chauha kan kal a, kan va ṭhut mai mai hian kan hlawkpui tur angin kan hlawkpui thei ṭhin lo a ni.
Motivational Speaker, Jim Rohn chuan, “I awmna hmunah i rilru zawng zawng pe rawh. Chhungkaw picnic a in kal chuan i laptop emaw hna thawh tur keng suh, thil dangah i rilru pe suh. Tui cheng la, ei tur siam rawh. I chhungte nen hlimin nui rawh u. Office kal kawnga car i khalh mek laiin thil dang leh vawiina i hna tur ngaihtuah suh. I car khalhah chiah rilru pe la, tawhsual i tawh palh chuan i vawiin hnain a tuar thei. Office i thlen tawh chuan i hnaah chiah rilru pe tawh zawk rawh,” tiin a sawi.
Delhi-a kan ṭhianpa, corporate lawyer pakhat chu, a thawhna Law Firm-ah chuan phone hi office hun chhung chuan an switch off ṭhin a, thil pawimawhah pawh a biak theih tawh ngai loh ṭhin. Kan thil tih leh hnathawh a kan hlawhtlin theihna turin hetiang taka rilru kan sawr bing hi a ngai tawh hle a ni. Tunlai ṭhalai tam takte hian, lehkha zirna leh hnathawhna hmunah phone kan inchhawp a, Facebook, YouTube,WhatsApp sttaus leh chanchin thar kan bih zuk zuk ṭhin a, lehkha zir leh hnathawh a tisawt lo thei hle.Hei hian kan nih theih ang ni phak lovin min siam thei.Thil ṭha ni awm taka lang pawh hi, a hun leh hmun a zirna a ṭhain a ṭha lo thei a ni.
Tu emaw hian, ni tin, i bank account-ah Rs.86,4000/- i duh dan leh i duh zat anga i hman turin dah lut ziah ta se.Ni khata i hman zawh loh, a bang zawng chu i account aṭang chuan a ni tawp apiangin lak bo zel ni dawn thung ta se, engtin nge i tih ang le? Rs.86,4000/- chu ni tin i hman zawh ngei ngei a ngai tihna a nih chu!Ni tin mai hian second 86,400 kan duh dana hman theih kan nei a. Mi tam zawk hian thil ṭul lo leh ṭangkai lo tih nan kan hmang a, ho lam takin kan khawhral mai mai ṭhin. Mi ropui leh hlawhtling kan nih duh chuan hun kan hman thiam a, kan hman dan tur pawh kan dah pawimawh a ṭul hle. Rilru pe lo deuha thil tih hi hun khawh ralna uiawm ber a ni. Kan thil tih laiah rilru pe ila, kan ni tin bank account-a pawisa awm kha kan hmang ṭha tihna a ni dawn a ni.
Nehemia khan, Jerusalem kulh chhia siam a nih dawn khan, a thil tih laiah a rilru kha a va han pe teh lul em! Sanbalata leh Tobia ten a rilru lak peng tuma hma an lak pawh khan enga tan mah a ngai lo a nih kha. Amah mai ni lo, kulh chhia siamtute pawh khan an thil tih laiah an rilru leh theihna zawng zawng an pe a, an hmelmaten an lo tibuai reng chung khan kulh siam an ṭhulh lo. An tih tura an chian em avang khan, ni 52 chhung lekin, Jerusalem kulh kha an siam ṭha zo leh thei a ni.
Keini ringtute phei chu hla siamtuin, “I hun ti thianghlim la, Lalpa pawl fo rawh,” a tih ang khan kan hunte hi ṭha takin hmang ila. Kan thil tih laiah kan theihna leh kan rilru zawng zawng pe chungin ti ṭhin ila. Hmelma Setana, a chhe ber min duhpuitu hian, min tihbuai a tum reng avangin, kan thil tihna reng rengah Pathian awmpuina pawh dil ṭhin ang u. Be there where you are and be there with God always!
-JC Lalnunsanga(AoR, Supreme Court)
